FL Group segir Kauphöllinni ekki heimilt að áminna

FL Group hefur sent frá sér yfirlýsingu sem er svar við athugasemdum Kauphallar Íslands um upplýsingagjöf fyrrnefnda fyrirtækisins. Segir í yfirlýsingunni að FL Group telji forsendur Kauphallarinnar á misskilningi byggðar og niðurstöðuna ekki nægilega rökstudda. Þá segir:

„Í tilfelli sölu hlutabréfa í AMR í lok nóvember 2007 var ákveðið að tilkynna um viðskiptin á sama tíma í New York Stock Exchange, heimamarkaði hlutabréfanna og á OMX. Í tilfelli sölu bréfa í Commerzbank var um að ræða sölu á stórum eignarhluta í mörgum smáum skömmtum yfir margra vikna tímabil.

Uppsöfnuð viðskipti voru tilkynnt OMX í samræmi við lög og reglur þar um, að mati FL Group. FL Group telur að í báðum tilvikum hafi verið staðið fullkomlega eðlilega að umræddri upplýsingagjöf, samkvæmt lögum og reglum og með hagsmuni félagsins og hluthafa þess að leiðarljósi."

Að lokum tekur FL Group það fram í yfirlýsingu sinni að Kauphöllin hafi enga heimild til að taka ákvörðun um beitingu opinberrar áminningar, hún hafi heimild til að birta opinbera yfirlýsingu varðandi mál en ekki til að beita opinberum áminningum. Hvergi sé kveðið á um slíka heimild til að áminna útgefendur.