Azinger ver Nick Faldo

Paul Azinger hefur komið til varnar Nick Faldo eftir að Bandaríkin unnu Evrópu í Ryder-bikarnum um helgina.

Faldo var fyrirliði Evrópu en hann hefur verið gagnrýndur fyrir ákvarðanatöku sína á mótinu.

„Þetta gengur bara þannig fyrir sér að annað liðið þarf að sætta sig við tap. Það er auðvelt að vera vitur eftir á, það var bara þannig að evrópska liðið var næstbest að þessu sinni og það hefur ekkert með það að gera að Faldo var fyrirliði," sagði Azinger, fyrirliði bandaríska liðsins.

Azinger segist skilja ákvarðanir Faldo á mótinu og að þeir fjölmiðlar sem skelli skuldinni á hann séu ósanngjarnir.