Yfirtökutilboð Exista í Skipti hf. talið sanngjarnt

Samkvæmt óháðu áliti sem MP Fjárfestingabanki (MPB) hefur sent frá sér telur bankinn að yfirtökutilboð Exista í Skipti hafi verið sanngjarnt.

„MPB hefur yfirfarið 3ja ára áætlun Skipta sem og fjárhagslegar niðurstöður fyrir fyrsta ársfjórðung 2008. MPB framkvæmdi sjóðstreymismat á Skiptum auk þess að skoða sambærileg skráð fyrirtæki. Að gefnum þeim forsendum sem að framan greinir, er það mat MPB að yfirtökutilboð Exista þann 27. mars 2008 hafi verið sanngjarnt," segir í áliti bankans.

„Samkvæmt yfirtökutilboðinu er gert ráð fyrir skiptigenginu 0,6574. Fyrir hvern hlut í Skiptum fást því 0,6574 hlutir í Exista. Þar sem Exista er í hópi veltuhæstu félaga á OMX ICE er seljanleiki bréfa Exista mikill. Þar af leiðandi gerir MPB ekki athugasemd við að Exista greiði hluthöfum Skipta með hlutabréfum í Exista. MPB vekur hins vegar athygli á því að þar sem um greiðslu er að ræða í hlutabréfum Exista munu breytingar á verði hlutabréfa Exista hafa bein áhrif á endanlegt verðmæti Skipta."

Ennfremur kemur fram að samkvæmt yfirtökutilboðinu hefur Exista engar áætlanir um að gera verulegar breytingar á starfsemi og starfsstöðvum Skipta, þ.m.t. störfum og starfsskilyrðum stjórnenda og starfsmanna Skipta. Stjórnendur Skipta hafa jafnframt staðfest að breyting á eignarhaldi Skipta og brotthvarf úr viðskiptum á OMX ICE muni ekki hafa veruleg áhrif á rekstur félagsins.

„Það er álit MPB að yfirtökutilboðið muni ekki hafa veruleg áhrif á starfsemi Skipta, starfsaðstöðu, stjórn eða starfsmenn. Álit MPB er byggt á forsendum sem geta hugsanlega ekki átt við hvern og einn fjárfesti. Það er ekki hlutverk MPB að leggja mat á hvort það þjóni hagsmunum einstakra hluthafa að samþykkja tilboðið eða hafna því. Álit MPB, sem hér er látið í ljós, er til upplýsingar og aðstoðar stjórn Skipta í tengslum við yfirtökutilboð Exista."