Vöruskiptin í apríl óhagstæð um 7,3 milljarða kr.

Í aprílmánuði voru fluttar út vörur fyrir 33,4 milljarða króna og inn fyrir 40,7 milljarða króna fob. Vöruskiptin í apríl voru því óhagstæð um 7,3 milljarða króna.

Greint er frá þessu á vefsíðu Hagstofunnar í morgun. Þar segir að fyrstu fjóra mánuðina 2008 voru fluttar út vörur fyrir 111,4 milljarða króna en inn fyrir 143,5 milljarða króna. Halli var á vöruskiptunum við útlönd sem nam 32,0 milljörðum kr. en á sama tíma árið áður voru þau óhagstæð um 25,4 milljarða kr. á sama gengi.

Fyrstu fjóra mánuði ársins 2008 var verðmæti vöruútflutnings 5,0 milljörðum eða 4,3% minna á föstu gengi¹ en á sama tíma árið áður. Útfluttar iðnaðarvörur voru nær helmingur alls útflutnings og var verðmæti þeirra 22,4% meira en árið áður.

Sjávarafurðir voru 43% alls útflutnings og var verðmæti þeirra 7,1% minna en á sama tíma árið áður. Mestur samdráttur varð í útflutningi skipa og flugvéla og sjávarafurða, aðallega frystra flaka, en á móti kom aukning í útflutningi á áli.

Fyrstu fjóra mánuði ársins 2008 var verðmæti vöruinnflutnings 1,6 milljörðum eða 1,2% meira á föstu gengi en á sama tíma árið áður. Mest aukning varð í innflutningi á hrá- og rekstrarvörum og eldsneyti og smurolíum en á móti kom samdráttur í innflutningi á flugvélum og fjárfestingavöru.