Kaupþing kærir viðskiptablað til norsku siðanefndarinnar

Kaupþing hefur kært norska viðskiptablaðið Dagens Næringsliv til Siðanefndar blaðamanna í Noregi. Ástæðan er fyrirsögn í blaðinu þann 10. maí s.l. um að viðskiptavinir Kaupþings væru að flýja frá bankanum.

Í tilkynningu um málið segir Jónas Sigurgeirsson uplýsingafulltrúi Kaupþings að Dagens Næringsliv hafi verið fullkunnugt um að þær tölur sem notaðar voru til stuðings efni fréttarinnar hafi verið orðnar úreltar. Þar að auki hafi verið byggt á röngum fréttaflutningi um að tryggingar Kaupþings í Noregi væru ekki nægar.

Jónas segir í samtali við Vísi að umfjöllun blaðsins hafi alls ekki verið í samræmi við veruleikann og að forsíðufyrirsögnin þar að auki ekki í neinu samræmi við textann inn í blaðinu. "Þess vegna ákváðum við að vísa þessu máli til Siðanefndarinnar," segir Jónas.

Lögfræðingur Kaupþings í Noregi Kyrre Eggen segir að erfitt sé að sjá hvernig fyrirsögnin á blaðinu og frétt af sama toga inn í blaðinu fái staðist reglur Siðanefndarinnar. Hann segir fréttina hafa verið mjög misvísandi og skaðlega fyrir Kaupþing.

Þess er skemmst að minnast að fyrir nokkru síðan kærði Kaupþing Ekstra Bladet danska af svipuðum sökum og vann það mál.