Greining Glitnis spáir 0,25% hækkun stýrivaxta í vikunni

Greining Glitnis spáir því að Seðlabankinn muni hækka stýrivexti sína um 0,25 prósentustig á fimmtudaginn og að stýrivextir verði í kjölfarið 15,75%.

Fjallað er um málið í Morgunkorni greiningarinnar. Þar segir að eins og kunnugt er mældist verðbólga 11,8% á ársgrundvelli í apríl og hefur ekki verið meiri í tvo áratugi.

Þá er útlit fyrir að Seðlabankinn hafi vanmetið verðbólgu á öðrum ársfjórðungi um 1,5 til 2 prósentustig í þjóðhagsspá bankans sem birt var samhliða síðustu vaxtatilkynningu 10. apríl.

Greiningin telur því að Seðlabankinn muni hækka vexti til að draga úr verðbólguvæntingum og varna enn frekari hækkun verðlags.

"Við teljum að hækkunin muni marka endalok vaxtahækkunarferils Seðlabankans sem staðið hefur yfir í fjögur ár. Jafnframt reiknum við með að bankinn muni hefja vaxtalækkunarferli í september og að vextir muni standa í 14,75% í lok þessa árs," segir í Morgunkorninu.