Spá 15,75% stýrivöxtum

Greining Glitnis spáir því að Seðlabankinn hækki vexti um 0,25 prósentustig til viðbótar, í 15,75%, á næsta vaxtaákvörðunardegi bankans 22. maí næstkomandi. Verðbólga í apríl mældist 11,8% á ársgrundvelli og hefur ekki verið meiri í tvo áratugi. Greining Glitnis segir að útlit sé fyrir að Seðlabankinn hafi vanmetið verðbólgu á öðrum fjórðungi ársins um 1,5 til 2 prósentustig í þjóðhagsspá bankans sem birt var 10. Apríl síðastliðinn.



Búast við stýrivaxtahækkun

Greining Glitnis telur því að Seðlabankinn muni hækka vexti á næsta fundi sínum til að veita verðbólguvæntingum trausta kjölfestu og varna enn frekari hækkun verðlags. Greining Glitnis gerir jafnframt ráð fyrir að sú stýrivaxtahækkun marki endalok vaxtahækkunarferlis bankans sem staðið hefur yfir í fjögur ár. Vísbendingar séu þegar komnar fram um að farið sé að hægja á vexti innlendrar eftirspurnar, bæði einkaneyslu og fjárfestingu heimila sem fyrirtækja. Hægt hafi á ársvexti greiðslukortaveltu, innflutningur bifreiða og varanlegra neysluvara fari nú hjaðnandi, kaupmáttur launa hafi dregist saman og tiltrú neytenda á núverandi efnahagsástand hafi minnkað. Þá ríki nánast verðstöðnun á fasteignamarkaði og velta á honum hafi dregist mikið saman auk þess sem nýjum íbúðalánum hafi fækkað mikið á milli ára.



Vaxtalækkun í september

Greining Glitnis býst við að Seðlabankinn hefji vaxtalækkunarferli sitt í september þegar skýr merki séu komin fram um kólnun hagkerfisins og að farið verði að draga úr verðbólguþrýstingi. Spáir Glitnir því að stýrivextir verði 14,75% í lok þessa árs. Greining Glitnis reiknar með að vextir verði lækkaðir hratt á næsta ári eftir því sem dragi úr verðbólguþrýstingi og hjól efnahagslífsins fari að snúast að nýju, að verðbólgumarkmið bankans náist um mitt árið og að vextir standi í 8% í árslok 2009. Áður spáði Greining Glitnis því að vextir yrðu 14,5% í lok þessa árs og 8% í lok þess næsta.



Krónan helst veik um sinn

Greining Glitnis segir að eftir snarpa gengislækkun krónunnar í mars og umtalsverðar sveiflur á gengi hennar í þeim mánuði hafi verulega dregið úr sveiflum á genginu. Skert aðgengi innlendra fjármálastofnana að erlendu lánsfé hafi valdið þrengingum á innlendum gjaldeyrisskiptamarkaði undanfarnar vikur, og haldi það gengi krónunnar lágu um þessar mundir. Við það bætist að innlendir og erlendir fjárfestar sæki lítið í áhættu núna og erfiðar aðstæður séu á alþjóðlegum fjármálamörkuðum. Því sé ekki mikið svigrúm til styrkingar krónunnar á meðan það ástand vari.



Evran í 105 í árslok

Greining Glitnis spáir því að gengisvísitala krónunnar haldist við núverandi gildi þar til birta taki á fjármálamörkuðum og að gengisvísitala erlendra gjaldmiðla verði að meðaltali 149 á öðrum fjórðungi ársins. Þegar alþjóðlegir lánamarkaðir opnist að nýju muni aðgangur fjárfesta að miklum vaxtamun við útlönd verða greiður og telur Greining Glitnis að krónan muni styrkjast allhratt af þeim sökum. Ógerningur sé hins vegar að tímasetja styrkinguna vegna þeirrar óvissu sem ríki um þróun alþjóðlegra lánsfjármarkaða. Greining Glitnis spáir því að gengisvísitalan standi nærri vísitölugildinu 135 í árslok, Bandaríkjadalur í tæpum 67 krónum og evran í 105 krónum. Í árslok 2009 verði gengisvísitalan í grennd við 126, dollarinn ríflega 62 krónur og evran nærri 98 krónum.