Greiðslujöfnun gæti minnkað greiðslubyrði um 20%

Greiðslujöfnunarvísitalan mun líklega lækka nokkuð á næsta ári og munur á greiðslubyrði eftir því hvort stuðst er við hana eða vísitölu neysluverðs gæti því numið allt að 20% að ári liðnu.

Þetta kemur fram í Morgunkorni greiningar Glitnis. Þar segir að greiðslujöfnun verðtryggðra húsnæðislána getur létt verulega greiðslubyrði slíkra lána á næstu misserum en þegar fram í sækir getur greiðslubyrðin þó orðið nokkru þyngri en ella.

Líklegt er einnig að heildarlánstími lengist hjá mörgum þeirra sem kjósa greiðslujöfnun, einkum ef lánstíminn var fremur stuttur fyrir.

Vísitala neysluverðs eins og hún kemur til verðtryggingar lána hefur hækkað um 15,1% það sem af er ári. Greiðslujöfnunarvísitalan hefur hins vegar hækkað um 7,2% á sama tíma. Má búast við að greiðslubyrði þeirra sem kjósa greiðslujöfnunarleiðina lækki sem þessu nemur strax í desember.

Þessi munur mun svo aukast enn meira á komandi mánuðum. Í verðbólguspá okkar sem birtist á dögunum spáðum við því að vísitala neysluverðs muni hækka um 8,4% á næstu 12 mánuðum. Útlit er hins vegar fyrir að laun muni að jafnaði hækka mun minna auk þess sem atvinnuleysi muni aukast hratt og gæti það farið upp í 8-10% af mannafla á tiltölulega skömmum tíma.