TM flytur í Síðumúla

Stjórn Tryggingamiðstöðvarinnar hefur ákveðið að flytja höfuðstöðvar félagsins að Síðumúla 24 í Reykjavík. Er þetta gert í kjölfar þess að félagið seldi fasteignafyrirtækinu Landic Property húsnæði sitt við Aðalstræti.

Í tilkynningu frá Tryggingamiðstöðinni segir að að við flutningana muni aðgengi viðskiptavina að þjónustu á höfuðborgarsvæðinu taka stakkaskiptum. Öll þjónusta verði á jarðhæð og gott aðgengi fyrir viðskiptavini. Miðað er við að starfsemin geti hafist á nýjum stað um næstu áramót.

„Við lítum á þessa flutninga á höfuðstöðvunum sem mikið tækifæri í að veita viðskiptavinum okkar á höfuðborgarsvæðinu enn betri þjónustu. Aðgengi að skrifstofum okkar í Aðalstræti hefur verið ófullnægjandi meðal annars vegna skorts á bílastæðum og því er mikilvægt að hafa fundið okkur nýjan stað sem liggur miðsvæðis í höfuðborginni," segir Sigurður Viðarsson, forstjóri TM, í tilkynningu félagsins.