FL Group lýkur endurfjármögnun Refresco

FL Group hefur lokið endurfjármögnun Refresco, leiðandi félagi í framleiðslu drykkjavara undir eigin vörumerkjum viðskiptavina í Evrópu.

FL Group leiddi hóp fjárfesta í yfirtöku á Refresco árið 2006, í samstarfi Kaupthing Capital Partners og Vífilfell, en saman vinna félögin að því að styðja stefnu framkvæmdastjórnar Refresco um frekari vöxt félagsins með yfirtökum og innri vexti.

Á árinu 2007 réðist Refreco í fjórar yfirtökur sem gerðu félaginu kleift að vaxa á nýjum mörkuðum, samþætta rekstrareiningar og auka við vöruúrval. Félögin sem Refresco yfirtók voru Kentpol, Nuits Saint-Georges, Histogram og Sun Beverages Company. Yfirtökurnar á Sun Beverage Company og Nuits Saint Georges voru gerðar til að auka umsvif félagsins í framleiðslu gosdrykkja og efla starfsemi á mörkuðum sem það starfaði þegar á. Histogram var fyrsta skref Refresco inn á breska drykkjarvörumarkaðinn sem er stærsti og þróaðasti "private label" markaður í Evrópu. Yfirtaka á Kentpol veitti félaginu aðgang að hinum ört vaxandi pólska markaði.

"Það er ánægjulegt að tilkynna um endurfjármögnun Refresco og endanlega samþættingu félaganna fjögurra, sem yfirtekin voru á síðasta ári, inn í rekstur Refresco. Sú staðreynd að umfram framboð var á mögulegu lánsfé, þrátt fyrir erfiðar markaðsaðstæður, sýnir að fjárfestar bera mikið traust til FL Group og getu félagsins til að hámarka arðsemi fjárfestinga sinna." segir Adam Shaw, framkvæmdastjóri London skrifstofu FL Group í tilkynningu um málið.