Vöruskipti hagstæð um 11 milljarða í október

Í októbermánuði voru fluttar út vörur fyrir 47,2 milljarða króna og inn fyrir 36,3 milljarða króna. Vöruskiptin í október voru því hagstæð um 10,9 milljarða króna. Í október 2007 voru vöruskiptin óhagstæð um 15,0 milljarða króna.

Fyrstu tíu mánuðina 2008 voru fluttar út vörur fyrir 369,7 milljarða króna en inn fyrir 401,5 milljarð króna. Halli var á vöruskiptunum við útlönd sem nam 31,8 milljörðum en á sama tíma árið áður voru þau óhagstæð um 110,8 milljarða. Vöruskiptajöfnuðurinn var því 79,0 milljörðum króna hagstæðari en á sama tíma árið áður.

Fyrstu tíu mánuði ársins 2008 var verðmæti vöruútflutnings 46,1 milljarði eða 14,2% meira en á sama tíma árið áður. Iðnaðarvörur voru 51,8% alls útflutnings og var verðmæti þeirra 52,3% meira en árið áður. Sjávarafurðir voru 36,0% alls útflutnings og var verðmæti þeirra 4,5% minna en á sama tíma árið áður. Mest aukning var í útflutningi á áli en á móti kom samdráttur í útflutningi sjávarafurða, auk þess sem sölur á skipum og flugvélum til útlanda drógust saman.

Fyrstu tíu mánuði ársins 2008 var verðmæti vöruinnflutnings 32,9 milljörðum eða 7,6% minna en á sama tíma árið áður. Mestur varð samdrátturinn í innflutningi á flutningatækjum, aðallega fólksbílum og flugvélum og í innflutningi á fjárfestingavöru og neysluvöru annarri en mat- og drykkjarvöru en á móti kom aukning í innflutningi á hrá- og rekstrarvörum og í verðmæti innflutnings á eldsneyti og smurolíum.