Leiðsögn listamanns

Yfirlitssýning á teikningum og skúlptúrum eftir myndlistarkonuna Sigrúnu Ólafsdóttur var opnuð í lok ágústmánaðar í Hafnarborg, menningar- og listastofnun Hafnarfjarðar. Það er fréttnæmt í sjálfu sér, en ekki er síður fréttnæmt að listáhugafólki býðst að ganga með Sigrúnu sjálfri um sýninguna í kvöld kl. 20 og hlýða á leiðsögn hennar.

Sköpunarkraftur Sigrúnar hefur einkum beinst að skúlptúrverkum og teikningum. Hún býr nú og starfar í Þýskalandi og nýtur talsverðrar velgengni þar; henni hefur meðal annars verið falið að gera stór verk fyrir opinberar byggingar, banka og einkafyrirtæki.

Verk hennar eru afar fjölbreytileg, bæði í hugsun og í útfærslu. Leiðarstef hennar er þrívíddarhluturinn og verk hennar vísa sífellt til rýmis á slíkan hátt að segja mætti að hún skilgreini það að nýju. Í innsetningum hennar eru til að mynda mörkin milli verksins sjálfs og rýmisins umhverfis það afmáð með áhrifamiklum hætti. Að undanförnu hefur Sigrún unnið að röð teikninga sem líta ber á sem sjálfstæðar skúlptúrteikningar. Í þeim gegnir línan einnig lykilhlutverki í myndbyggingunni og skapar hugmyndalega samsvörun við skúlptúrverkin. Teikningarnar sem hún hefur gert allra síðustu árin eru afar stórar og unnar með túss og gifsblöndu á striga sem telst nokkuð óvenjulegt efnisval.

Synd væri að láta þessa áhugaverðu leiðsögn framhjá sér fara. - vþ