Línuhönnun athyglisverðust á Verki og viti

Stórsýningin Verk og vit 2008 er nú í fullum gangi í Laugardalshöll, en þar kynna um 100 sýnendur sem tengjast byggingariðnaði, mannvirkjagerð og skipulagsmálum vörur sínar og þjónustu. Nú síðdegis voru kynntar niðurstöður dómnefndar á vegum skipuleggjenda á vali athyglisverðustu sýningarrýmanna á Verki og viti 2008.

„Það var fyrirtækið Línuhönnun sem bar sigur úr býtum. Í umsögn dómnefndar kom fram að stílhreint útlit og einfaldleiki spiluðu listavel saman hjá Línuhönnun ásamt sérstaklega vel unnu markaðsefni. Jafnframt þótti áhersla fyrirtækisins á að kynna starfsfólk sitt ekki síður en fyrirtækið til eftirbreytni.

Smekklegt litasamspil, opið og gott rými auk góðs viðmóts starfsfólks fleyttu BM Vallá í annað sæti að mati dómnefndarinnar og fyrirtækið Áltak lenti í þriðja sæti. Þeirra sýningarrými vakti athygli fyrir það að bjóða upp á skemmtilega upplifun gesta við að ganga í gegnum hljóðgöng auk þess sem litasamsetning þótti vel heppnuð. Fyrirtækið Borg hlaut svo sérstaka aukaviðurkenningu fyrir heimilislegt og notalegt sýningarrými sem kynnti vel starfsemi fyrirtækisins auk þess sem viðmót starfsfólks þótti afar gott.

Dómnefndina skipuðu Erlendur Örn Fjeldsted byggingatæknifræðingur, Guðmundur Oddur Magnússon, prófessor í grafískri hönnun, Lárus Halldórsson, framkvæmdastjóri hjá Mat Englanna og stjórnarmaður í Ímark, Sólveig Ólafsdóttir, arkitekt hjá Studio Striki, og Elsa Giljan Kristjánsdóttir, sýningarstjóri Verks og vits 2008.

Sýningin Verk og vit 2008 var opnuð fyrir almenning í dag, en hún hefur verið opin fyrir fagaðila í byggingariðnaði, mannvirkjagerð og skipulagsmálum frá því á fimmtudag. Mikill fjöldi gesta hefur heimsótt sýninguna og gert er ráð fyrir að aðsókn verði áfram góð um helgina. Verk og vit 2008 er stærsti viðburður sinnar tegundar sem haldinn hefur verið hér á landi.

Gestir hafa gert góðan róm að sýningunni telja að sýnendur leggi mikinn metnað í sýningarsvæði sín þar sem sumir hafa reist heilu húsin. Á Verki og viti 2008 eru hátt í 100 sýnendur sem tengjast byggingariðnaði, mannvirkjagerð og skipulagsmálum.

Verk og vit verður opin í dag milli klukkan 12 og 18 og á morgun, sunnudag, milli klukkan 12 og 17.

Nýbygging Háskólans í Reykjavík, fyrirhugað háskólasjúkrahús, nýr sameinaður Tækniskóli, nýjungar í vetnisvæðingu, risaborvagn frá Ístaki og mörg af stærstu skipulagsverkefnum höfuðborgarsvæðisins eru meðal þess sem fyrir augu ber á Verki og viti. Þá eru kynntar fjölmargar tækninýjungar í byggingariðnaði og mannvirkjagerð auk þess sem sýnd eru nýjustu tæki og tól fyrir áhugamenn jafnt sem atvinnumenn í byggingariðnaði."