Þriggja daga veiði í Miðfjarðará kostar hálfa milljón

Miðfjarðará við Laugabakka er um 200 km frá Reykjavík en hún er 113 km löng með yfir tvö hundruð merktum veiðistöðum. Áin er af mörgum talin fallegust áa hér á landi en veiðisvæðið samanstendur af fjórum ám. Dagurinn í Miðfjarðará kostar um 150 þúsund krónur með gistingu í glæsilegu veiðihúsi og fæði.

Samkvæmt upplýsingum af heimasíðu Lax-á sem er umsjónaraðili árinnar á hún marga fastakúnna sem geta ekki hugsað sér eitt sumar án Miðfjarðarár. Áin samanstendur af fjórum ám; Miðfjarðará, Austurá, Vesturá og Núpsá.

Guðlaugur Þór, Vilhjálmur Þ., Björn Ingi, Haukur Leósson, Stefán H. Hilmarsson og fleiri voru í ánni þann 11.-14.ágúst í fyrra en á því tímabili má einungis veiða á flugu.

Björn Ingi og Vilhjálmur Þ. segja báðir að Haukur Leósson hafi boðið sér í túrinn en Guðlaugur Þór segist hafa gert upp við Hauk síðar. Miðað við kostnaðinn við þriggja daga veiði í ánni mun Haukur Leósson því hafa greitt um tvær milljónir fyrir vini sína, en fengið um hálfa milljón greidda tilbaka frá heilbrigðisráðherra.

10 stangir eru leyfðar á fimm veiðisvæðum í ánni í einu. Samkvæmt upplýsingum Vísis voru allar stangirnar skráðar á Baug.