Guðjón Valur: Erum ekki hættir

„Venjulega segir maður bara tvö stig og ekkert annað en þessi sigur þýðir að við erum á leið í undanúrslit á Ólympíuleikum og það er einfaldlega frábær tilfinning," sagði Guðjón Valur Sigurðsson að vonum glaður eftir sigurinn á Pólverjum.

„Annars vil ég bara hrósa öllum sem standa að þessum hópi. Leikmenn, þjálfarar, framkvæmdastjóri, nuddari, læknir og bara allir saman. Það eru allir búnir að standa sig stórkostlega og eiga þátt í því að við erum komnir alla þessa leið. Við erum ekki hættir. Ég vil að það komi skýrt fram," sagði Guðjón Valur ákveðinn.

„Gummi sá til þess að í sumar að liðið mætti í frábæru líkamlega ástandi hingað til Peking. Við erum líka duglegir að undirbúa okkur andlega. Tölum mikið saman og menn í sömu stöðum að fara yfir hlutina sem og menn sem spila við hliðinu á hvort öðrum. Það er mikill og góður undirbúningur. Það vinna allir saman og ekkert breytist þó það þurfi að skipta mönnum af velli. Hér eru allir með allt á hreinu," sagði Guðjón Valur sem hrósar liðsheildinni sem hann segir alveg magnaða.