Vísitala framleiðsluverðs hækkaði um 6,3% í apríl

Vísitala framleiðsluverðs í apríl 2008 var 145,9 stig og hækkaði um 6,3% frá mars 2008.

Þetta kemur fram á vefsíðu Hagstofunnar í morgun. Vísitala framleiðsluverðs fyrir sjávarafurðir var 162,0 stig, sem er hækkun um 3,2% frá fyrri mánuði og vísitala fyrir stóriðju var 187,9 stig, hækkaði um 11,7%.

Vísitalan fyrir matvæli hækkaði um 6,3% frá mars, aðallega vegna verðhækkunar mjólkurafurða. Vísitala fyrir annan iðnað hækkaði um 5,6%.

Vísitala framleiðsluverðs fyrir vörur sem framleiddar voru og seldar innanlands hækkaði um 6,7% milli mánaða en fyrir útfluttar afurðir hækkaði hún um 6,1%.

Frá apríl 2007 hefur vísitala framleiðsluverðs hækkað um 20,3% og verðvísitala sjávarafurða um 28,3%. Afurðir stóriðju hafa hækkað um 27,8% á sama tíma en matvælaverð hefur hækkað um 12,1%