Fjarskiptafyrirtækið Kall í Færeyjum verður að Vodafone

Færeyska fjarskiptafyrirtækið Kall, sem er í eigu Íslendinga, hefur tekið upp nýtt nafn og starfar frá og með deginum í dag undir nafni Vodafone.

Í tilkynningu um málið segir að samhliða nafnabreytingunni verður Vodafone í Færeyjum gert að dótturfélagi Vodafone á Íslandi, en bæði fyrirtækin eru í eigu eignarhaldsfélagsins Teymis hf.

Bjarni A. Bjarnason, forstjóri Vodafone í Færeyjum, segir það mikinn heiður fyrir starfsfólk Kalls að alþjóðafyrirtækið Vodafone skuli semja við Kall um samstarf og heimila Færeyingum noktun á þekktasta vörumerkinu í fjarskiptaheiminum.

"Með því að gerast hluti af stærsta farsímafyrirtæki í heimi getum við boðið okkar viðskiptavinum betri og fjölbreyttari þjónustu en áður hefur þekkst í Færeyjum," segir Bjarni. "Okkar viðskiptavinir munu njóta góðs af vörum og þjónustuleiðum sem Vodafone hefur þróað um allan heim og lægra verði fyrir farsímaþjónustu," segir Bjarni

Vodafone er fyrsta fjarskiptafyrirtækið í Færeyjum sem býður viðskiptavinum að lækka símkostnaðinn á ferðalögum erlendis með því að nýta verðskrá Evrópusambandsins vegna farsímaþjónustu (svokallað Euro-Tariff) en hingað til hafa Færeyingar ekki notið góðs af henni.

Þá hefur fjöldi reikisamninga tvöfaldast frá því sem var og viðskiptavinir Vodafone í Færeyjum geta nú notað farsímann sinn í meira en 100 löndum um allan heim.