Bloomberg átti síður von á óbreyttum stýrivöxtum

Vefritið Bloomberg greinir frá því að komið hafi á óvart að Seðlabanki Íslands tilkynnti um óbreytta stýrivexti í vikunni, aðeins sex dögum eftir að hafa tekið erlent neyðargjaldeyrislán frá norrænum seðlabönkum.

Blaðamenn Bloomberg greina frá því að þrír af tíu hagfræðingum sem þeir ráðfærðu sig við hafi gert ráð fyrir óbreyttum vöxtum en hinir sjö hafi talið hækkun í kortunum.

Enn fremur er gerð grein fyrir því að gjaldeyrisráðstafanir bankans hafi orðið til þess að styrkja krónuna um 6,3% gagnvart evru en þó séu enn blikur á lofti þar sem orðstír viðskiptabankanna hafi beðið hnekki sem auðveldlega geti veikt krónuna á ný. Er Bjarke Roed-Frederiksen, hagfræðingur hjá Nordea-bankanum borinn fyrir þessum tíðindum.