Víkingar fá stærri lóð við Stjörnugróf

Knattspyrnufélagið Víkingur hefur fengið fyrirheit um stækkun athafnasvæðis félagsins við Stjörnugróf eftir að núgildandi leigusamningur við gróðrastöðina Mörk rennur út, árið 2016. Borgarráð samþykkti þetta á fundi sínum í gær. Þá var skipulagsráði Reykjavíkurborgar falið að láta kanna möguleika á nýrri staðsetningu gróðrastöðvarinnar Markar í samráði við eigendur hennar.

Fyrirheitið um stækkun athafnasvæðisins við Stjörnugróf er með fyrirvara um ákvarðanir sem kunna að verða teknar varðandi stækkun athafnasvæðis félagsins í framkvæmda- og eignaráði, skipulagsráði og íþrótta- og tómstundaráði. Enn fremur er fyrirvari vegna breytinga á deiliskipulagi, sem nauðsynlegar eru í þessu skyni.