Verslunum lokað vegna samdráttar

HP Farsímalagerinn ehf. sem rekur verslanir Hans Petersen og Farsímalagersins hefur lokað eða sameinað fjórum af verslunum sínum undanfarnar vikur.

„Í kjölfar mikils samdráttar í sölu, það sem af er árinu, hefur félagið brugðist við með hagræðingu í rekstrinum," segir í tilkynningu frá Kjartani Erni Sigurðssyni, framkvæmdastjóra fyrirtækisins. Hann segir að samfara lokunum verslana hefur starfsfólki fækkað en að áfram verður leitað leiða til að ná jafnvægi í rekstrinum.

Verslun Hans Petersen í Smáralind, sem var inní Hagkaupum, hefur verið lokað og móttaka fyrir framköllun flutt í verslun Farsímalagersins sem er við hliðina á Bæjarins Bestu og bakarí Jóa Fel í Smáralindinni. Samfara þessari breytingu hefur Farsímalagerinn í Smáralind hafið sölu á sérvöldu vöruúrvali frá Hans Petersen eins og Lomography myndavélum o.fl.

Verslun Farsímalagersins á Laugavegi 178 hefur verið flutt inní verslun Hans Petersen í sama húsnæði. Þá hefur verslun Farsímalagersins í Miðhrauni 14 í Garðabæ verið lokað.

Aðrar verslanir Farsímalagersins eru í Kringlunni, Smáralind, Laugavegi 178, Bankastræti og á netinu.

Verslun Hans Petersen í Firðinum í Hafnarfirði hefur verið lokað og móttaka fyrir framköllun þar með talið ósóttar vinnslur hefur verið flutt í Farsímalagerinn Smáralind.

Aðrar verslanir Hans Petersen eru í Kringlunni, Laugavegi 178 og Bankastræti.