Valur vann Grindavík

Einn leikur fór fram í Iceland Express deild kvenna í dag er Valur vann sigur á Grindavík, 69-61.

Grindavík hafði yfirhöndina eftir fyrsta leikhluta, 16-13, en eftir það tóku Valsmenn yfirhöndina og leiddu allt til loka leiksins.

Tinna Sigmundsdóttir skoraði 21 stig fyrir Val og tók ellefu fráköst þar að auki. Þórunn Bjarnadóttir kom næst með tólf stig.

Ingibjörg Jakobsdóttir skoraði flest stig í liði Grindavíkur eða nítján talsins. Íris Sverrisdóttir skoraði alls tólf stig í leiknum.

Bæði lið voru með átta stig fyrir leikinn en Valur er nú í fimmta sæti með tíu stig, rétt eins og KR.