LSS opnar fjárfestingarleiðir hjá séreignasjóði sínum

Lífeyrissjóður starfsmanna sveitarfélaga (LSS) hefur lokið endurmati eigna í séreignarleiðum og því hafa fjárfestingarleiðir sjóðsins verið opnaðar að nýju.

Í tilkynningu um málið segir að aðstæður á íslenskum fjármálamarkaði hafi haft áhrif á eignir séreignarleiða sjóðsins en aðgerðir í eignastýringu hafa á undanförnum misserum miðað markvisst að því að minnka áhættu.

Með auknu vægi ríkisskuldabréfa og kerfisbundinni sölu á hlutabréfum tókst að draga verulega úr neikvæðum áhrifum á eignasöfn séreignarleiðanna.

Í kjölfarið hafa allar eignir séreignarleiðanna verið endurmetnar. Ljóst er að ástandið hefur haft nokkur áhrif til lækkunar. Við endurmatið er varúðar gætt og vonir standa til að niðurfærsla á eignum verði minni er reiknað er með.

Nafnávöxtun fjárfestingarleiðanna fyrstu ellefu mánuði ársins, að teknu tilliti til niðurfærslu, er sú að leið 1 hefur skilað 1,9%, leið 2 hefur skilað 13,7% og leið 3 hefur skilað 21,5%.