Dýrasta bók landsins uppseld

Þau hundrað eintök sem komu af Flóru Íslands eftir Eggert Pétursson fyrir jól eru seld. Alls voru prentuð fimm hundruð eintök og afgangurinn kemur um miðjan janúar frá Kína. Að sögn Kristjáns B. Jónassonar, útgefanda bókarinnar, hafa þegar myndast biðlistar eftir þeim eintökum og á Kristján alveg eins von á því að þau verði rifin út þegar þau loksins komast til landsins. Flóra Íslands kostar litlar 75 þúsund krónur og er því dýrasta bókin sem gefin er út um þessi jól á Íslandi. Bókin vegur 12 kíló og er því einnig hugsanlega þyngsta bókin um þessa jól í bókstaflegum skilningi.

Upphaflega var gert ráð fyrir því að einhver eintök rötuðu í jólapakka valinna viðskiptavina gömlu viðskiptabankanna sem höfðu lagt inn sæmilega stórar pantanir. „Það rann því kalt vatn milli skinns og hörunds þegar þeir fóru, einn af öðrum, á hausinn," segir Kristján. Hins vegar hafi viðtökur almennings verið það góðar að áhyggjurnar reyndust óþarfar. „Það kom mér eiginlega á óvart hversu almennur áhugi var mikill enda bókin kannski ekki á hefbundnu bókaverði," segir Kristján.

Kristján vill ekki meina að hann komi frá verkefninu sem milljónamæringur. Framleiðslukostnaðurinn sé mikill þótt Kristján vilji ekki gefa hann upp.

„Það eru margar, margar milljónir," segir Kristján sem vonast bara til að hann komi út á sléttu.

Hann segir kaupendurna vera úr öllum þjóðfélagsstigum en samkvæmt heimildum Fréttablaðsins höfðu engu að síður þekktir aðilar úr gamla bankakerfinu fjárfest í bókinni upp á eigin spýtur. Kristján vildi ekkert tjá sig um það, sagði Flóru Íslands vera fyrir alla.- fgg