365 fer af markaði í byrjun ágúst

OMX Nordic Exhcange Iceland hf. hefur samþykkt beiðni 365 hf. um töku hlutabréfa félagsins úr viðskiptum. Hlutabréfin verða tekin úr viðskiptum eftir lokun viðskipta föstudaginn 8. ágúst 2008. Þetta kemur fram í tilkynningu frá félaginu þar sem einnig er rætt um uppgjör á öðrum ársfjórðungi 2008.

„Vegna fyrirhugaðrar afskráningar fór fram tilboð til hluthafa félagsins um kaup á bréfum hluthafa á genginu 1,20 kr. Eigendur 7,2% hlutafjár í 365 hf., eða 185 aðilar hafa samþykkt kauptilboðið.

Eigendur tæplega 93% hlutafjár (þar af rúm 2% í eigin bréfum félagsins), eða um 625 aðilar, munu eiga hluti sína áfram í félaginu eftir afskráningu þess" segir ennfremur.

Eins og fram hefur komið hér á Vísi tapaði félagið 2.117 milljónum eftir skatta á öðrum ársfjórðungi þessa árs. Í tilkynningunni kemur fram að rúmlega milljarður af því hafi verið vegna gengistaps.

Heildarafskriftir félagsins voru 702 milljónir króna og þar af niðurfærsla viðskiptavildar upp á 438 milljónir. Stjórnendur telja þó að reksturinn verði ekki langt frá útgefnum áætlunum, sem telja megi viðunandi miðað við þær erfiðu aðstæður sem nú ríkja í íslensku efnahagslífi.

Í tilkynningunni segir að tekjur fyrri hluta árs hafi aukist um 27% frá fyrra ári en þær námu tæpum 7 milljörðum króna.