Guðbrandur í útrás með íslenskar mjólkurafurðir

Guðbrandur Sigurðsson, forstjóri Auðhumlu, hefur ákveðið að láta af störfum hjá félaginu um næstu mánaðamót eftir ríflega þriggja ára starf hjá því og fyrirrennurum þess.

Auðhumla er móðurfélag Mjólkursamsölunnar og er í eigu 700 mjólkurframleiðenda um land allt. Guðbrandur mun taka við framkvæmdastjórastarfi hjá Nýlandi sem er í meirihlutaeigu hans. Það félag mun taka að sér sölu og markaðssetningu íslenskra mjólkurafurða erlendis fyrir Mjólkursamsöluna auk þess að sinna ýmsum öðrum verkefnum, eins og segir í tilkynningu frá Auðhumlu.

Magnús Ólafsson, sem tók við starfi Guðbrands sem forstjóri hjá MS í upphafi árs, verður einnig forstjóri Auðhumlu tímabundið. Magnús var þar áður forstjóri Osta- og smjörsölunnar.

„Ég er mjög sáttur við þessi þrjú ár sem ég hef verið hjá félaginu en hlutverk mitt hefur fyrst og fremst verið að koma á þeim miklu breytingum sem þar hafa orðið. Á síðastliðnum þremur árum er búið að sameina sex félög innan mjólkuriðnaðarins í eitt öflugt félag sem hefur alla burði til að takast á við þau verkefni sem íslenskur mjólkuriðnaður stendur frammi fyrir í dag.

Ég er ákaflega ánægður að hafa náð samkomulagi við Mjólkursamsöluna um áframhaldandi samstarf um útflutning mjólkurafurða en þar tel ég mikil tækifæri liggja fyrir íslenska mjólkurframleiðendur á komandi árum. Þá vil ég nota tækifærið og þakka fyrir það góða samstarf sem ég hef átt við mjólkurframleiðendur og starfsfólk félagsins", segir Guðbrandur Sigurðsson í tilkynningunni.