Kviðdómur Díönurannsóknar íhugar niðurstöðu

Kviðdómur í réttarrannsókninni á dauða Díönu prinsessu hefur dregið sig í hlé til að íhuga úrskurð sinn. Síðustu tvo daga hefur Scott Baker lávarður og dánardómstjóri dregið saman helstu sönnunargögn áður en hann sendi kviðdóminn úr dómsalnum.

Sex konur og fimm menn kviðdómsins hafa eytt næstum sex mánuðum í að hlusta á vitnisburð 250 vitna í átta mismunandi löndum. Auk þess hafa þau skoðað sönnunargögn málsins.

Starf kviðdómendanna er að ákveða hvaða vitnisburði þau geti treyst og hvaða vitnisburði þurfi að taka með varúð.

Það getur verið yfirþyrmandi en dánardómstjórinn sagði; „Að sjálfsögðu þurfið þið að íhuga smáatriði, en það kemur að því að það verður nauðsynlegt að stíga skref afturábak til að sjá hvort myndin er skýr og fá yfirsýn."

Að lokum þurfa þau að komast að niðurstöðu um hvernig Díana og Dodi létust í Alma göngunum í París fyrir rúmum áratug.

Niðurstaða þeirra mun að öllum líkindum verða skráð í sögubækur.

Kviðdómurinn mun íhuga fimm mögulega úrskurði:

- Manndráp af gáleysi vegna stórkostlegrar vanrækslu í akstri ljósmyndara sem eltu Mercedes bifreið Díönu.

- Manndráp af gáleysi vegna stórkostlegrar vanrækslu í akstri Henri Paul sem ók Mercedes bílnum.

- Manndráp af gáleysi vegna stórkostlegrar vanrækslu í akstri ljósmyndara og Henri Paul. Þetta jafngildir morði af yfirlögðu ráði og kviðdómnum var sagt að hann yrði að vera viss í sinni sök.

- Slys. Þetta gæti orðið niðurstaðan ef kviðdómurinn kemst að þeirri niðurstöðu að ökulagið hafi verið slæmt, en ekki nógu slæmt til að vera flokkað sem stórkostleg vanræksla.

- Opinn úrskurður. Ef kviðdómur er á einu máli um að ekki séu nægileg sönnunargögn til að styðja einhvern framangreindra úrskurða.

Dánardómstjórinn sagði að kviðdómurinn ætti ekki að skila opnum úrskurði ef þau geti einfaldlega ekki verið sammála, eða sem merki um vanþóknun.

Kviðdómendum hefur verið afhent rannsóknarréttarform sem er opinbert skjal og þeim ber að rita úrskurðinn á. Þeim er einnig ætlað að bæta við skýringum sem styðja úrskurðinn. Þar er átt við þætti sem þeir telja að hafi vegið þungt í harmleiknum eins og mikill hraði, áfengisneysla og að farþegar hafi ekki verið í sætisbelti.