Mál Jóhanns Bergs skýrist í vikunni

Jóhann Berg Guðmundsson á von á því að sín mál komist á hreint í þessari viku. Hann er kominn aftur til landsins eftir að hafa verið hjá Coventry til reynslu.

„Ég get voða lítið sagt annað en að þetta kemur væntanlega í ljós á næstu dögum," sagði Jóhann Berg í samtali við Vísi.

Chris Coleman, stjóri Coventry, sagði í samtali við fjölmiðla í Englandi að hann hefði hrifist mjög af Jóhanni.

Sjálfur sagði hann að sér hafi litist vel á félagið. „Þetta var mjög skemmtilegt og það var gaman að hitta Aron (Einar Gunnarsson, leikmann Coventry)."

Jóhann hefur einnig æft með þýska úrvalsdeildarfélaginu Hamburg en hann sagði þetta afar ólík félög. „Coventry er talsvert minna félag og því allt öðruvísi en Hamburg. En mér leist mjög vel á bæði félög."