Greining Kaupþings spáir 10% verðbólgu í apríl

Greining Kaupþings spáir 1,7 prósenta hækkun á vísitölu neysluverðs í apríl. Gangi spáin eftir mun tólf mánaða verðbólga mælast 10 prósent samanborið við 8,7 prósenta verðbólgu í mars.

 

Í umfjöllun sinni um spána segir greiningin að svipaðir þættir drífi áfram verðbólgu, veiking krónu ásamt verðhækkun á eldsneyti og hrávörum. Gengisveiking nú virðist svipa til þess sem gerðist í síðustu niðursveiflu 2001-2002. Áhrifin á verðbólgu komi fram með snöggum hætti en fjara hratt út á þremur mánuðum eftir gengisveikingu.

 

Gert er ráð fyrir að húsnæðisliðurinn haldi áfram að hækka vegna hækkandi raunvaxta nýrra íbúðalána á síðasta ári. Markaðsverð húsnæðis mun áfram hafa óveruleg áhrif á verðbólgutölur.

 

Greiningin gerir ráð fyrir að verðbólga mælist áfram há í maímælingu Hagstofunnar. Í sumar tekur hins vegar að draga úr verðbólguhraðanum, þegar áhrif yfirskots krónunnar hefur gengið yfir og húsnæðisliðurinn lækkar.