Algjört andleysi

„Mér fannst eins og að leikurinn væri tapaður frá fyrstu mínútu. Það var engin stemning og engin barátta og strákarnir höfðu greinilega enga trú á verkefninu,“ sagði Sigurður Sveinsson, einn sérfræðinga Vísis um EM í handbolta.

Ísland tapaði í dag fyrir Frökkum, 30-21, og átti aldrei glætu í leiknum.

„Mér fannst áberandi hvað sóknarleikurinn var slakur. Hann var rosalega tilviljunarkenndur og markverðirnir voru með okkur hreinlega í vasanum."

„Ef við ætlum okkur að komast eitthvað áfram í þessu móti verða þeir Einar, Ásgeir, Logi og sérstaklega Snorri Steinn að koma sér í gang. Snorri verður að stjórna sóknarleiknum og fá meiri hraða í hann."

„Miðað við leikinn gegn Slóvökum var þetta eins og svart og hvítt. Í gær spiluðum við hraðan og fínan bolta en þetta var bara göngubolti í dag."

Hann segir að Frakkar hafi mætt gríðarlega vel stemmdir til leiks í dag. Þeir hafi greinilega ætlað sér að hefna ófaranna frá HM í fyrra.

„Þeir pökkuðu okkur saman á fyrstu 20 mínútunum. Við áttum ekki séns í vörnina þeirra og fyrir aftan hana var Omeyer mjög góður."

Framundan er milliriðillinn þar sem Þýskaland, Spánn og Ungverjaland bíða okkar. Öll þessi lið koma með tvö stig með sér úr C-riðli en Ísland hefur leik án stiga í milliriðlakeppninni.

„Þetta er ekki búið. Við þurfum bara að byrja að spila almennilega. Við þurfum að koma okkur upp úr fyrsta gírnum og tel ég að sóknin hafi ekki verið að spila á nema 50 prósent getu. Við eigum fullt inni."

Líklegt þykir að Ólafur Stefánsson verði orðinn leikfær fyrir leikina í milliriðlinum.

„Það hefur vantað Óla með sín 5-6 mörk og stoðsendingar. Þeir eru greinilega ekki að valda þessu án hans."