Stærsta verkfræðistofa landsins verður til

Verkfræðistofurnar VGK-Hönnun og Rafhönnun hafa verið sameinaðar undir nafninu Mannvit. Fram kemur í tilkynningu frá félögunum að með sameiningunni verði til stærsta verkfræðistofa landsins með um 360 starfsmenn.

Grunn að hinu nýja félagi leggja þrjár rótgrónar verkfræðistofur sem allar voru stofnaðar á sjöunda áratug síðustu aldar. Það eru Hönnun hf, Verkfræðistofa Guðmundar og Kristjáns og Rafhönnun. Forstjóri hins nýja félags er Eyjólfur Árni Rafnsson en aðstoðarforstjórar þeir Runólfur Maack og Skapti Valsson.

Þá segir í tilkynningunni að með sameiningunni náist fram mikil samlegðaráhrif þar sem sérfræðiþekking félaganna skarast lítið. Höfuðstöðvar Mannvits verða að Grensásvegi í Reykjavík þar sem unnið er að því að stækka og endurbæta húsnæðið. Stefnt er að því að taka nýjar höfuðstöðvar í notkun haustið 2009 en fram að því verður fyrirtækið einnig til húsa að Laugavegi 178 og Ármúla 42. Mannvit rekur auk þess níu starfsstöðvar utan höfuðborgarsvæðisins.

Mannvit á hlut í nokkrum fyrirtækjum í tengdri starfsemi, þar á meðal HRV Engineering ehf., sem býr yfir sérhæfðri tækniþekkingu og reynslu í uppbyggingu álvera, Geysi Green Energy ehf., Vatnaskilum ehf., Loftmyndum ehf. og Skipaskoðun Íslands ehf.