Velta í dagvöruverslun eykst en fatakaup dragast saman

Velta í dagvöruverslun jókst um 7,2% í mars síðastliðnum miðað við sama mánuð árið áður á föstu verðlagi. Fataverslun dróst saman um 13% í mars.

Þetta kemur fram í tölum frá Rannsóknarsetri verslunarinnar sem segir skýringuna á þessari miklu veltuaukningu milli mánaða í dagvöruverslun megi líklega rekja til þess að páskarnir voru í mars.

Sala áfengis jókst um 4,4% í mars miðað við sama mánuð árið. Verð á áfengi hækkaði um 2,3% frá því í mars í fyrra.

Samdráttur varð í fata- og skóverslun á milli ára. Fataverslun dróst saman um 13% í mars miðað við sama mánuð í fyrra á föstu verðlagi. Veltan jókst um 9,4% í mars miðað við mánuðinn þar á undan.

Skóverslun minnkaði í mars um 30,4% á milli ára. Verð á fötum í mars hækkaði um 5% frá því í mars í fyrra og verð á skóm hækkaði um 11,6% á sama tímabili, samkvæmt verðmælingu Hagstofu Íslands.

Í mars jókst velta í húsgagnaverslun um 15,9%. Athyglisvert er að verð á húsgögnum hefur nánast haldist óbreytt frá því í sumar á meðan talsverðar hækkanir hafa orðið á öðrum vörum, sérstaklega síðustu mánuði.