Kaldir vindar blása um Kaupþing í London

Breska blaðið The Guardian fjallar um Kaupþing og starfsemi bankans í London. Segir blaðið að kaldir vindar blási um Kaupþing þar þessa dagana og spurning hvort lánveitingar bankans til fasteignamógúla og litríkra fjárfesta sé of stór biti fyrir bankann að kyngja.

Blaðið bendir á að meðal kúnna Kaupþings sé sjónvarpskokkurinn Gordon Ramsey sem hefur tekið lán hjá bankanum til að víkka út veitingahúsaveldi sitt, tískubúðaeigandinn Karen Miller, skoski milljarðamæringurinn Tom Hunter og fasteignamógúllinn Robert Tchenguiz.

Þessi listi er áhrifamikill en síðan bendir The Guardian á að bankinn fjármagnaði Tchenguiz í kaupunum á Sommerfield upp á 1,5 milljarð punda árið 2005 og að sú eign sé nú til sölu. Bankinn var ráðgjafi Mike Ashley í kaupunum á fótboltaliðinu Newcastle og það sé til sölu. Bestu lántakendur bankans séu Candy-bræðurnir sem eru að byggja lúxusíbúðir í bestu hverfum London. Fasteignamarkaðurinn í Bretlandi sé hins vegar ekki í góðu standi þessa dagana.

Og raunar getur blaðið þess að Kaupþing hafi verulega dregið úr lánum sínum til fasteigna en markaðurinn féll um 20 prósent á síðasta ári.

Þar að auki kemur fram að greinendur dáist að þvi hve vel Kaupþingi hefur tekist að draga úr kostnaði sínum og ná markmiðum sem sett eru hvað það varðar.

The Guardian segir að hér eftir muni Kaupþing einbeita sér að veita fjármálaþjónustu til smærri og meðalstórra fyrirtækja og einstaklinga með miklar eignir að baki sér. Því hafi starfsemi bankans í Leeds og Manchester verið flutt til London og Birmingham.