Íslandsmet á skuldabréfamarkaði

Á síðustu tveimur dögum hafa átt sér stað gríðarleg viðskipti á íslenskum skuldabréfamarkaði eða sem nemur 157 milljörðum króna. Þar af var veltan í gær 108 milljarðar kr. sem er hið mesta á einum degi frá því að viðskipti með skuldabréf hófust í Kauphöll Íslands. Veltan samanlögð síðustu tvo daga hefur verið meiri en sem nam heildarveltu með hlutabréf allan aprílmánuð.

Þetta kemur fram í hálf fimm fréttum Kaupþings. Þar segir ennfremur:

„Viðskiptin hafa bæði beinst að verðtryggðum og óverðtryggðum bréfum þó heldur meira hafi verið selt af þeim verðtryggðu eða 96 ma. kr. á síðustu tveim dögum. Þessi miklu viðskipti hljóta strax að vekja þá hugsun að stórir erlendir aðilar séu nú að taka stöðu á íslenskum skuldabréfamarkaði og þannig hagnýta sér hagstætt gengi krónunnar, háa vexti Seðlabankans og mikla verðbólgu. Það verður ekki annað sagt en þessi tími sé hagstæður fyrir slíka stöðutöku þrátt fyrir að raunvaxtakrafan hafi lækkað nokkuð frá áramótum.

Hingað til hefur áhugi útlendinga einkum beinst að skammtímastöðutökum á gjaldeyrismarkaði svo hér væri um nokkra breytingu að ræða. Hins vegar svipar þessu til þess sem gerðist eftir mikið gengisfall krónunnar 2001 þegar erlendir aðilar sóttu inn á verðtryggða markaðinn hérlendis. Innkoma erlendra fjárfesta á þennan markað nú yrði að teljast mjög jákvæð þar sem nokkur lausafjárskortur hefur verið til staðar."