Tap á XL samsvarar framlagi ríkisins til háskóla

Upphæðin sem Eimskip tapaði á eign sinni í XL samsvarar öllum framlögum ríkisins til háskóla landsins og stæði að auki undir framlögum til dómstólanna og öryggismála ríkisins. Landsbankinn treystir því að ekki sé von á fleiri fýlusprengjum vegna ævintýralegra fjárfestinga félagsins. Verð hlutabréfa í Eimskipum féllu um 21% í dag.

Raunarsögu viðskiptanna með hlut Eimskips í XL Lesure Group má rekja aftur til ársins 2004 þegar Atlanta undir stjórn Magnúsar Þorsteinssonar kaupir tæplega þrjátíu og eins prósenta hlut í XL. Atlanta varð síðar að Avion sem keypti svo Eimskip og nafn Avions hvarf og varð Eimskip. Tapið á þessu eina félagi á átta árum er 27 milljarðar, tala sem venjulegt launafólk á erfitt með að skilja. Til að setja hana í samhengi má bera hana saman við stærðir úr þjóðarbúskapnum.

Fyrir 27 milljarða má reka þrjá háskóla eins og Háskóla Íslands í eitt ár, en framlög ríkisins til Háskóla Íslands í ár er níu milljarðar króna.

Framlög ríkisins til allra háskóla landsins eru tuttugu og tveir milljarðar, þannig að fyrir tap Eimskipa má standa undir öllum þeim framlögum og að auki þeim 4,5 milljörðum sem ríkissjóður leggur til dómstóla landsins á ári og til öryggismála.

Öldrunar- og endurhæfingarstofnanir fá 25 milljarða á þessu ári frá ríkissjóði þannig að upphæðin sem Eimskip tapar nú stendur undir allri þeirri þjónustu og að auki væri hægt að byggja Landeyjahöfn sem kosta mun tvo milljarða.

Ásgeir Friðgeirsson talsmaður Landsbankans segir að Landsbankinn telji rekstur Eimskipa standa vel þótt fyrirtækið hafi misstigið sig illa í fjárfestingum. Hjá Landsbankanum treysti menn því að ekki sé von á fleiri ótíðindum vegna misráðinna fjárfestinga félagsins og að allt sé nú komið upp á borðið. Eftir yfirtöku Björgúlfsfeðga á skuldbindingu Eimskipa komi þrennt til greina, að lengja í lánum og endurfjármagna, létta á skuldum með sölu eigna eða gefa út nýtt hlutafé.