Síminn og Alcan gera fimm ára þjónustusamning

Síminn og Alcan á Íslandi (ISAL) hafa undirritað fimm ára þjónustusamning um rekstur tölvukerfa ISAL og ráðgjöf.

Í tilkynningu um málið segir að um sé að ræða víðtækan samning sem nær í aðalatriðum yfir flest öll tölvukerfi ISAL. Samningurinn tekur gildi 1. janúar 2009 og mun Síminn sjá um rekstur miðlægra tölvukerfa, notendaþjónustu og þjónustuborð, afritunarþjónustu, öryggisráðgjöf, hugbúnaðarþjónustu og iðntölvuþjónustu fyrir ISAL.

Rannveig Rist, forstjóri Alcan á Íslandi, segir að samningurinn hafi mikla þýðingu fyrir starfsemi ISAL. „Við vinnum eftir mjög skýrum öryggisstöðlum og leggjum mikla áherslu á að allir okkar birgjar séu traust og áreiðanleg fyrirtæki. Síminn hefur veitt ISAL þjónustu undanfarin ár með miklum ágætum. Við vitum að tölvukerfin okkar eru í traustum og öruggum höndum hjá Símanum auk þess sem í þessu felst töluverð hagræðing".

Sævar Freyri Þráinsson, forstjóri Símans segur það afar ánægjulegt að gera þennan 5 ára samning við ISAL og efla þannig samstarfið milli fyrirtækjanna enn frekar. "Starfsmenn Símans og ISAL hafa unnið að þessu verkefni frá því í vor enda um margþætta þjónustu að ræða. Ég er þess fullviss að þessi samningur hafi í för með sér aukið öryggi tölvukerfanna sem og aukið hagræði í rekstri ISAL."