Samkomulagi Seðlabanka fagnað

Viðskiptaráð fagnar samkomulagi Seðlabanka Íslands við Seðlabanka Svíþjóðar, Noregs og Danmerkur í tilkynningu sem samtökin sendu frá sér í gær. Sama gerði forsætisráðuneytið.

„Tvíhliða gjaldeyrisskiptasamningar sem þessir eru mikilvægt fyrsta skref í eflingu trúverðugleika Seðlabanka Íslands og íslensks hagkerfis,“ segir í tilkynningu Viðskiptaráðs.

Jafnframt er áréttað að vegna þess hve vöxtur íslenska bankakerfisins hafi verið mikill undanfarin ár sé afar mikilvægt að innviðir og stofnanaumgjörð innanlands taki mið af því.

„Í kjölfar aukinna lánalína telur Viðskiptaráð skynsamlegt að ríkissjóður leitist eftir erlendri lántöku í samstarfi við Seðlabanka Íslands til að auka gjaldeyrisforða verulega.“

Geir H. Haarde forsætisráðherra kveðst jafnframt fagna samkomulaginu. Í tilkynningu kemur fram að ríkisstjórnin og Seðlabankinn hafi að undanförnu undirbúið margvíslegar aðgerðir til að styrkja aðgang Seðlabankans að erlendu lausafé og efla traust á fjármálakerfi og efnahagslífi hér.

„Til þess að bæta virkni peningamálastefnunnar mun ríkisstjórnin meðal annars þegar undirbúa og birta trúverðuga áætlun um umbætur og breytingar á skipulagi Íbúðalánasjóðs,“ segir hann.

Viðskiptaráð fagnar sérstaklega fyrirhuguðum breytingum á Íbúðalánasjóði.