Icelandic Group skráð af markaði

Stjórn Icelandic Group hyggst leggja það til á aðalfundi félagsins þann 18. apríl að stjórninni verði heimilað að óska eftir því að félagið verið afskráð úr Kauphöll Íslands. Þetta kemur fram í tilkynningu frá félaginu.

Þar segir einnig að Icelandic Group hafi að mati stjórnar félagsins undanfarin ár ekki náð að nýta sér kosti þess að vera skráð félag. Þannig hafi fá viðskipti verið með bréf félagsins, verðmyndun óskilvirk auk þess sem dreifing hlutafjár sé lítil og undir viðmiðum kauphallarinnar. Félagið vinnur nú að fjárhagslegri endurskipulagningu og hagræðingu. Gengi bréfa í Icelandi Group hefur hríðfallið í Kauphöllinni frá áramótum, eða um nærri 65 prósent.

„Útgáfa skuldabréfs með breytirétti er liður í þessari fjárhagslegu endurskipulagningu og mun hún gera félaginu kleift að vinna að sínum markmiðum. Í ljósi þess að skráning í kauphöll getur verið íþyngjandi, m.a. vegna upplýsingaskyldu sem getur skekkt stöðu gagnvart óskráðum samkeppnisaðilum og að Icelandic Group hf. er ekki sem skyldi að njóta góðs af kostum skráningar, telur stjórn félagsins að hér sé um skynsamlega ráðstöfun að ræða sem sé félaginu og hluthöfum þess til hagsbóta," segir í tilkynningunni.