Aðdáendur Sigga Páls fagna

Sigurður Pálsson hlaut á fimmtudaginn Íslensku bókmenntaverðlaunin 2007 í flokki fagurbókmennta fyrir Minnisbók. Fáir fögnuðu sigri Sigurðar jafn innilega og meðlimir Singapore Sling. Þeir voru staddir úti í Berlín í gær þegar þeir heyrðu fréttirnar. „Þetta voru frábær tíðindi,“ segir Henrik Björnsson söngvari. „Við opnuðum kampavínsflösku um leið og við heyrðum þetta.“

Henrik og Sigurður Finnsson hristuleikari eru mestu aðdáendur Sigurðar í sveitinni. Aðdáunin gekk svo langt að þeir héldu sérstök „Sigurðar Pálssonar-kvöld“ fyrir nokkrum árum. „Þá hittumst við með fleiri strákum eins og Ugga Ævarssyni fornleifafræðingi og Berki Jónssyni leikmyndahönnuði. Við lásum ljóðin hans Sigurðar upphátt fyrir hver annan, drukkum rauðvín og vorum að sjálfsögðu í svörtum frökkum og með alpahúfur.“

Henrik á erfitt með að gera upp við sig hvað sé besta verk Sigurðar. „Þetta eru allt mjög góðar bækur. Ég er að lesa Minnisbókina hans hérna á túrnum og hún er algjör snilld. Mér finnst ekkert skrítið að hann hafi unnið þetta.“

Singapore Sling hefur verið á Evróputúr síðustu vikurnar. Sveitin er að kynna safnplötu með lögum sínum sem nýlega kom út hjá fyrirtæki í Berlín og spilar einnig ný lög sem Henrik á von á að komi út á nýrri plötu í sumar. Á túrnum hefur hljómsveitinni ekki bara borist góðar fréttir til eyrna. „Við vorum í Steyr í Austurríki þegar við heyrðum um Ólaf F og það allt. Ég get alveg sagt þér að það var ekkert kampavín drukkið það kvöld. Bara bjór.“