Sólveig Káradóttir: Mætti með bítlasoninn Dhani til Yoko

„Ég vil ekkert tjá mig um þetta og ætli ég haldi mig ekki bara við aðstoðarmanna-söguna," segir fyrirsætan og sálfræðineminn Sólveig Káradóttir. Sólveig, sem er dóttir Kára Stefánssonar, forstjóra deCODE, hefur þráfaldlega verið orðuð við Dhani Harrison, son Bítilsins George Harrison og Oliviu Harrison. Þær sögusagnir fengu byr undir báða vængi þegar þau mættu saman í móttöku borgarstjóra Reykjavíkur í Hafnarhúsinu eftir að hafa fylgst með ekkju Johns Lennon, Yoko Ono, kveikja á Friðarsúlunni úti í Viðey.

Vísir greindi frá vinfengi þeirra Sólveigar og Dhani í september en þá vildi Sólveig ekkert kannast við að örvar Amors hefðu hæft þau í hjartastað heldur að hann væri „aðstoðarmaður hennar", eins og hún komst að orði þá.

Sólveig sagði í samtali við Fréttablaðið í gær að þau Dhani hafi ekki staldrað lengi við meðal þotuliðsins í Hafnarhúsinu. Enda kunni hún ekkert sérstaklega vel við sig í slíkum hópi. Dhani fékk síðan far með Ringo Starr á einkaþotunni og flaug til London en Sólveig er á leið til New York þar sem hún hyggst klára BA-ritgerð sína í sálfræði.

En samband þeirra Sólveigar og Dhani er farið að vekja athygli og Egill Helgason sá sig knúinn til að greina frá því á bloggi sínu að hann hefði jafnvel séð vísi að sköpun næsta tengdasonar þjóðarinnar í hlaðborði borgarstjórans. „Dhani var í fylgd […] með ljóshærðri íslenskri stúlku. Ég sá ekki betur en að hann væri að kyssa hana. Nýr tengdasonur fyrir þjóðina?" spyr Egill á bloggi sínu og bætir því við að Dhani hafi verið sá eini úr Bítlafamilíunni sem hann hafi komist í tæri við og hann hafi lýst yfir ánægju sinni með útgáfu Dhani og Jakobs Dylan, syni Bob Dylan, á laginu Gimme Some Truth.

Sólveig er dóttir Kára Stefánssonar, forstjóra deCODE, og hefur getið sér gott orð fyrir fyrirsætustörf. Dhani er hins vegar meðlimur í electro-blues hljómsveitinni thenewno2.