Rólegt á götum Kaupmannahafnar í morgun

Lögregla býr sig undir harða öldu mótmæla á Norðurbrú í dag en þar sem hundruð mótmælenda voru handteknir í gær er búist við því að eitthvað verði rólegra í dag. Rólegt hefur verið á götum Kaupmannahafnar í morgun en þó eru enn einhverjar götur lokaðar og til að mynda hefur strætóleiðum verið breytt framhjá átakasvæðunum.

Lögreglumenn bíða í rútum eftir því að átök brjótist út á ný og haft er eftir lögreglumanni á vef Politiken að menn sitji rólegir og bíði meðan þeir gæða sér á kaffi og franskbrauði með jarðaberjasultu.

Kaupmannahafnarlögreglunni hefur borist liðsauki bæði frá Fjóni og Jótlandi og hefur aldrei verið meiri lögregluviðbúnaður í Kaupmannahöfn.

Aðstandendur Ungdomshuset hafa boðað fund í kvöld þar sem líklega verður ákveðið með næstu skref.

Bæði danskir fjölmiðlar og Ritt Bjerregaard borgarstjóri Kaupmannahafnar hafa hrósað löreglunni fyrir aðgerðirnar í gær og eru sammála um að bæði rýming hússins og að halda mótmælendum í skefjum hafi tekist mjög vel þrátt fyrir geysilega erfiðar aðstæður. Bjerregaard kom fyrr heim úr fríi í Noregi vegna atburðana á Norðurbrú. Hún vísaði því í gær á bug að það væri stjórnmálamönnum að kenna hvernig komið væri fyrir Ungdomshuset og þeim sem þar hafa haldið sig. Hún benti á að fólkinu hefði verið boðið annað húsnæði og leitað hefði verið allra lausna á málinu.

Fjórir slösuðust alvarlega í átökunum í gær. Sá sem slasaðist verst brann illa á hendi þegar bensínsprengja sprakk í höndunum á honum.