Britney komin úr meðferð

Söngkonan Britney Spears hefur verið útskrifuð af meðferðarheimili í Kaliforníu eftir mánaðardvöl. Að sögn umboðsmanns hennar gekk meðferðin vel. „Við viljum biðja fjölmiðla um að virða einkalíf hennar og fjölskyldu hennar og vina á þessari stundu," sagði hann.

Britney, sem er 25 ára, fór í meðferðina 22. febrúar eftir að hafa valdið umheiminum miklum áhyggjum er hún tók upp á því að raka sig af sér allt hárið á hárgreiðslustofu nokkurri. Hún hafði tvisvar áður farið í meðferð en ávallt stungið af eftir eins dags dvöl.

Britney á tvö börn með fyrrverandi eiginmanni sínum, Kevin Federline; hinn fimm mánaða Jayden James og Sean Preston sem er 17 mánaða. Þau hafa sameiginlegt forræði yfir þeim eins og málin standa í dag.