X-Faktor sýndur í Færeyjum

Færeyingurinn Jógvan Hansen hefur vakið mikla athygli fyrir frammistöðu sína í X-Faktor og eins og Fréttablaðið hefur áður sagt frá ríkir sannkallað Jógvans-æði í Færeyjum. Vinsældir hans í heimalandinu hafa nú náð nýjum hæðum því færeyska ríkisjónvarpið hefur keypt sýningarréttinn á þeim sex þáttum sem eftir eru.

„Það er sannkölluð útrás hjá Stöð tvö," segir Pálmi Guðmundsson, sjónvarpsstjóri Stöðvar tvö, og hlær. „En þetta sýnir þann mikla áhuga sem Færeyingar hafa á sínum manni og er ekki síður mikil viðurkenning fyrir Saga film, sem framleiðir þáttinn. Þetta er í fyrsta sinn að mér vitandi sem innlend framleiðsla er seld á annan markað." Þátturinn verður þó ekki sýndur í beinni útsendingu í Færeyjum heldur nokkrum dögum eftir að hann er sýndur hér.

Jógvan hefur gengið vel í keppninni fram að þessu, ávallt fengið góða umsögn dómara og aldrei þurft að verma tvö neðstu sætin sem allir keppendurnir óttast.