Kjarasamningar kyndi ekki undir verðbólgu

Bankastjórn Seðlabankans sendi í dag skilaboð um fara yrði varlega í kjarasamningum og sagði aukna verðbólgu ekki auðvelda það verk sem snúið væri fyrir. Þá sæjust ekki merki um samdrátt á vinnumarkaði og það gæti haft áhrif á verðbólgu.

Bankastjórnin kynnti í morgun rökstuðning sinn fyrir því að halda stýrivöxtum óbreyttum í 13,75 prósentum. Bendir stjórnin á að verðbólga hafi verið meiri síðastliðna tvo mánuði en búist var við og hún sé nú nokkru meiri en samrýmist verðbólguspá bankans í nóvember. Þá hafi eftirspurn aukist hraðar á þriðja fjórðungi ársins en áætlað var og vísbendingar séu um svipaða framvindu á yfirstandandi fjórðungi. Verðbólguhorfur til skamms tíma séu því lakari en við síðustu vaxtaákvörðun. Hins vegar hefur ekki orðið afgerandi breyting á verðbólguhorfum sé litið til lengri tíma.

Skilyrði á erlendum mörkuðum versna

Bankastjórnin bendir hins vegar að skilyrði á erlendum fjármálamörkuðum hafi enn versnað og þá hafi innlendir vextir hækkað verulega frá síðustu vaxtahækkun bankans og framboð lánsfjár dregist saman. Verð hlutabréfa hafi einnig lækkað verulega undanfarna mánuði sem auki fjármagnskostnað fyrirtækja og veiki efnahagsreikning þeirra og heimilanna. Þessi þróun leiði væntanlega til lækkunar á verði fasteigna á næstu misserum eins og þegar hefur orðið víða erlendis. Það munid hafa bein áhrif á verðbólgu í gegnum húsnæðislið vísitölunnar og óbein áhrif vegna minni innlendrar eftirspurnar.

Því muni óhagstæð fjármálaskilyrði og lækkun eignaverðs draga úr eftirspurn og verðbólguþrýstingi. Á móti gæti komið lækkun á gengi krónunnar en áframhaldandi styrkur hennar sé háður vilja erlendra fjárfesta til að nýta vaxtamun og þar með að fjármagna viðskiptahallann. Hallinn hafi minnkað hraðar en búist var við en undirliggjandi halli sé enn mikill.

Verðbólgumarkmið næst um mitt ár 2009

Bankastjórnin telur enn fremur að með óbreyttum stýrivöxtum nú megi ná verðbólgumarkmiðinu, það er 2,5 prósenta verðbólgu, innan svipaðs tíma og fólst í grunnspá sem kynnt var í Peningamálum í nóvember, þ.e. um miðbik ársins 2009. Hins vegar gæti óhagstæðari gengis- og launaþróun en búist var við tafið fyrir hjöðnun verðbólgu.

„Viðræður um kjarasamninga standa yfir. Aukin verðbólga auðveldar ekki það verk sem er snúið fyrir. Enn sjást þess ekki ótvíræð merki að dregið hafi úr spennu á vinnumarkaði. Afleiðingin gæti orðið óhagstæðari launaþróun gagnvart verðbólgu en spáð var í nóvember. Verði niðurstaðan sú eða verðbólguhorfur versna af öðrum ástæðum mun bankastjórnin bregðast við," segir í röstuðningnum.

Næsta ákvörðun bankastjórnar Seðlabankans um stýrivexti verður tilkynnt 14. febrúar 2008.