Tveggja milljarða tap vegna AMR-bréfa bókfært á 4. ársfjórðungi

FL Group hefur selt stærstan hluta eignar sinnar í AMR, móðurfélagi American Airlines, en hlutur félagsins í AMR hefur lækkað um 15 milljarða króna á árinu. FL Group segir að salan styrki stöðu sjóða FL Group um tíu milljarða.

FL Group segir lækkun á bréfum AMR fyrst og fremst skýrast af mikill hækkun olíuverðs og spám markaðsaðila um minni hagvöxt í Bandaríkjunum. Þrátt fyrir að jákvæð skrefi hafi verið stigin af hálfu AMR telur FL Group að of mikil óvissa ríki um breytingar hjá félagi og hvenær þeim yrði hrint í framkvæmd.

Auk þess séu blikur á lofti um áframhaldandi hækkun olíuverðs og hugsanlegan samdrátt í bandarísku efnahagslífi. Í því ljósi var það ákvörðun félagsins að selja megnið af hlut sínum í AMR og skoða aðra fjárfestingakosti á markaði í kjölfarið, eins og segir í tilkynningu FL Group.

Í lok þriðja ársfjórðungs var markaðsvirði hlutar FL Group í AMR um 31,2 milljarðar króna. Á árinu 2007 hefur eignin lækkað um 15 milljarða króna, þar af hafa um 13 milljarðar nú þegar verið gjaldfærðir á fyrstu níu mánuðum ársins. Tveir milljarðar verða gjaldfærðir á fjórða ársfjórðungi.

FL Group átti 9,3 prósenta hlut í AMR fyrir söluna en á eftir sölu 1,1 prósent.