NBA í nótt: LeBron meiddist og Cleveland tapaði

Cleveland átti ekki möguleika gegn Detroit Pistons eftir að LeBron James meiddist í öðrum leikhluta í leik liðanna í NBA-deildinni í nótt.

Detroit skoraði 30 stigum meira en Cleveland í síðari hálfleik og vann þægilegan sigur, 109-74.

LeBron James meiddist þegar hann keyrði upp að körfu Detroit og Nazr Mohammed, leikmaður Detroit, braut á honum. Mohammed ætlaði í boltann en fór illa í vinstri hendi James með þeim afleiðingum að hann tognaði á fingri.

James kláraði reyndar fyrri hálfleikinn en varð svo að hætta. Ekki liggur ljóst fyrir nú hversu lengi hann verður frá.

Cleveland hafði unnið síðustu fjóra leiki sína í deildinni, nú síðast gegn Bolton Celtics.

Richard Hamilton skoraði átján stig fyrir Detroit og Tayshaun Prince sextán. Þrátt fyrir allt var LeBron stigahæsti leikmaður Cleveland með fimmtán stig.

Alls fóru tíu leikir fram í NBA-deildinni í nótt. Yao Ming skoraði 31 stig fyrir Houston sem vann þriðja leik sinn í röð, í þetta sinn gegn Phoenix, 100-94. Steve Nash var stigahæstur hjá Phoenix með 29 stig.

Toronto vann Memphis, 103-91, en liðið varð fyrir áfalli er Chris Bosh meiddist á nára og varð að hætta í miðjum leik. Andrea Bargnani meiddist einnig er hann marðist á hægra hné. Anthony Parker var stigahæsti leikmaður Toronto með nítján stig.

Þá kom Dallas sér aftur á rétta braut eftir þrjá tapleiki í röð og vann Minnesota í nótt, 109-103. Dirk Nowitzky skoraði 27 stig fyrir Dallas en stigahæstur hjá Minnesota var Al Jefferson með 31 stig og fjórtán fráköst.

Tony Parker skoraði 29 stig og var með ellefu stoðsendingar fyrir San Antonio sem vann Washington á heimavelli, 109-94. Manu Ginobili bætti við nítján stigum og Tim Duncan sextán.

Þá hélt Orlando Magic sigurgöngu sinni áfram með fjórða sigri sínum í röð og alls fjórtánda sigri liðsins í deildinni í vetur með sextán stiga sigri á Seattle, 110-94. Dwight Howard var með 39 stig fyrir Orlando og tók þar að auki sextán fráköst.

Þá vann Utah sigur á Philadelphia, 106-95, og Atlanta vann Milwaukee, 96-80. Golden State vann einnig góðan sigur á Sacramento, 109-94, og Indiana vann Portland, 95-89.