Íslendingar hafa ekki efni á að tapa verðbólgubaráttunni

Davíð Oddsson seðlabankastjóri segir að Íslendingar hafi ekki efni á því að tapa baráttunni við verðbólguna. Þetta kom fram á fundi Viðskiptaráðs í morgun um stýrivexti.

Ákvörðun bankastjórnar Seðlabankans um að hækka stýrivexti síðastliðinn fimmtudag var meðal þess sem Davíð gerði að umræðuefni sínu. Hann líkti stríðinu við verðbólguna við landhelgisstríðið sem oft hefur verið baðað miklum ljóma.

„Einhvern tíma var sú skýring gefin að Íslendingar hefðu unnið þann ójafna slag af því að þeir hefðu ekki haft efni á að tapa honum. Sama lögmál gildir í raun og veru um baráttuna við verðbólguna. Við höfum ekki efni á því að tapa henni," sagði Davíð og bætti við „Verðbólga má ekki festast í sessi á ný og við verðum því að taka slaginn hversu óþægilegur og jafnvel kostnaðarsamur sem hann reynist til skemmri tíma."

Þá gerði Davíð velgengni Íslendinga á erlendri grundu að umstalsefni og sagði útrásarorðið vera slíkt töfraorð að nánast mætti ekki minnast á neikvæðar hliðar þess. Sannleikurinn væri hins vegar sá að á meðan ríkið og Seðlabankinn væru að greiða hratt niður skuldir sínar þá væri Ísland að verða óþægilega skuldsett erlendis.

„Okkur Íslendingum hefur gengið vel að undanförnu og menn hafa að mestu kunnað fótum sínum forráð. En það er heimskulegt að halda því fram eða trúa því að við getum slakað á kröfum til okkar sjálfra ef áfram á að fara vel. Ein þeirra krafna er örugglega sú að leyfa ekki verðbólgu að festast í sessi á nýjan leik. Allur undansláttur á þeirri kröfu mun bitna á almenningi í landinu með ófyrirsjáanlegum afleiðingum," sagði Davíð.