Svört bráðabirgðaskýrsla um Írak

Íröskum stjórnvöldum hefur aðeins tekist að ná innan við helmingi þeirra markmiða sem Bandaríkjaþing setti um leið og fé var veitt til að fjölga í herliði Bandaríkjamanna í Írak. Þetta er niðurstaða bráðabirgðaskýrslu sem kynnt verður á Bandaríkjaþingi í dag. Enn fjölgar í hópi flokksfélaga Bush Bandaríkjaforseta sem vill að bandarískt herlið verði kallað heim.

Bandaríkjastjórn kynnir þingi skýrsluna í dag. Talið er að í skýrslunni verði skýrt frá því að Írakar eigi langt í land með að ná þeim markmiðum sem sett voru. Fulltrúar Bush Bandaríkjaforseta leggja þó áherslu á að þetta sé aðeins bráðabirgðaskýrsla og endanleg skýrsla liggi fyrir í september.

Meðal helstu skilyrða sem sett voru af Bandaríkjaþingi sem skilyrði fyrir aukinni fjárveitingu til herliðsins var að stjórnarskrá landsins yrði breytt þannig að tekið yrði á málefnum héraða, félagar í fyrrverandi stjórnarflokk Saddams Hússeins fengu störf, sett yrðu lög um hvernig skipta ætti olíutekjum og skipan í öryggissveitir yrði jöfn milli þjóðarbrota.

Talið er að í skýrslunni komi fram að tekist hafi að ná tæpum helmingi markmiðanna og flest lúti þau að skipan og starfsemi öryggissveita. Á móti er talið að skýrslan verði áfellisdómur á störf Nouris al-Malikis, forsætisráðherra, sem hafi samkvæmt henni ekki tekist að sætta ólík sjónarmið mismunandi þjóðarbrota og ekki náð þeim pólitíska árangri sem talin var þörf á. Fyrrverandi Bathistar hafi átt erfitt með að fá störf og það valdi alvarlegum árekstrum, ekki hafi tekist að sættast á hvernig skipta eigi olíugróðanum.

Demókratar á Bandaríkjaþingi og margir flokksfélagar Bandaríkjaforseta í Repúblíkanaflokknum eru ósáttir við þróun mála og vilja að brotthvarf bandarískra hermanna frá Írak verði tímasett hið fyrsta. Bandaríkjaforseti hefur á móti hótað því að beita neitunarvaldi á hvert það lagafrumvarp sem tímasetji brotthvarf.