Jackson á ekki von á að Bryant fari frá Lakers

Engin frétt hefur stolið senunni jafn rækilega í NBA deildinni síðustu vikur eins og yfirlýsing Kobe Bryant um að hann vilji fara frá liði LA Lakers. Bryant virðist harður á því að vilja fara frá félaginu, en þjálfari hans Phil Jackson á ekki von á því að liðið verði án hans þegar keppni hefst á ný í deildinni í haust.

"Hann virðist vera búinn að taka ákvörðun sem hann vill ekki breyta - ákvörðun sem ég hef lagst harðlega gegn - og heldur því fram að hann hafi ástæður til að fara frá félaginu. Ég hinsvegar alveg sannfærður um að hann verður leikmaður LA Lakers þegar æfingabúðirnar hefjast í október," sagði Jackson í samtali við LA Times.

Bryant átti fund með eiganda félagsins í Barcelona á Spáni á föstudaginn og þar er hann sagður hafa ítrekað ósk sína um að fá að vera skipt frá félaginu. Talsmenn LA Lakers vísa þessum fregnum á bug og hefur eigandinn Jerry Buss þegar sent ársmiðahöfum bréf þar sem hann ítrekar að félagið muni gera allt sem það getur til að byggja upp sterkt lið í kring um Bryant. "Liðið hefur verið í úrslitakeppninni í 26 af síðustu 28 árum og við viljum öll meira," sagði Buss.

Kobe Bryant hefur verið einn besti leikmaður NBA deildarinnar undanfarin ár og er enn ekki orðinn 29 ára gamall. Hann á fjögur ár og 88,6 milljónir dollara eftir af sjö ára og 136 milljón dollara samningi sínum við Lakers sem hann undirritaði árið 2004. Hann hefur verið stigakóngur deildarinnar síðustu tvö ár og er nífaldur stjörnuleikmaður.

Eins og til að skvetta olíu á eldinn greindi New York Times svo frá því í dag að myndband með Kobe Bryant væri nú við það að fara í loftið á netinu þar sem Bryant tjáði sig á miður fallegan hátt um leikmenn og stjórn LA Lakers. Þar á hann m.a. að segja skoðun sína á því þegar félagið gugnaði á því að fá til sín leikstjórnandann Jason Kidd fyrir lokun leikmannagluggans í vetur þar sem liðið vildi ekki láta hinn unga Andrew Bynum í skiptunum. "Við erum að tala um Jason Kidd!" á Bryant að hafa sagt gáttaður og blótað eigandanum Mitch Kupchack.