Engin átök í Tallinn í nótt

Stjórnvöld í Eistlandi kenna Rússum um þær óeirðir sem urðu í landinu fyrir helgi. Tvær nætur í röð kom til átaka milli mótmælenda og lögreglu vegna minnismerkis um fallna hermenn í seinni heimsstyrjöldinni sem stjórnvöld létu fjarlægja úr miðborg Tallinn á föstudaginn. Ekki kom til átaka í höfuðborginni í nótt.

Einn mótmælandi lét lífið í óeirðunum á fimmtudaginn en hundrað og fimmtíu hafa særst. Lögregla hefur handtekið átta hundruð mótmælendur. Urmas Paet, utanríkisráðherra Eistlands, segir ráðamenn í Moskvu hafa látið ögrandi orð falla í deilunni um leið og þeir hafi skipt sér af innanríkismálum Eista.