Þingmenn ætla að brjótast til valda

Þingmenn í Ekvador, sem forseti landsins hafði áður rekið úr embætti, hétu því í dag að brjótast í gegnum girðingar lögreglu og taka sæti sín á ný. Mikil spenna hefur verið í stjórnmálum í landinu að undanförnu þar sem forseti landsins, Rafael Correa, hefur heitið því að halda þjóðaratkvæðagreiðslu sem myndi leiða til stofnunar stjórnarskrárþings. Það á síðan að breyta stjórnarskránni og draga verulega úr völdum þingsins.

Alls rak Correa 57 þingmenn úr embætti en þeir hafa af öllum mætti reynt að koma í veg fyrir að þjóðaratkvæðagreiðslan fari fram. Meirihluti almennings hefur þó staðið á bak við Correa þar sem þingmennirnir eru almennt álitnir spilltir.